事緣就係我種嘅黑胡椒，喺過咗2020年後急速成長🥴
起初我以為係因為天氣轉涼令佢生得好咗，但後尾發現黑胡椒嘅平均生長溫度係24-26度，咁溫度又未必係一個原因令佢成長⋯⋯再加上我冇改變到照燈時間（16小時）同營養液嘅份量（5大滴) 莫非植物都憎2020年憎到唔大⋯⋯
最後，由Google大神解決咗我嘅疑問🤔！ 係因為！有「人」嘅陪伴！
喺年尾嘅時候，屋企人買多咗一個盆栽返嚟。 本來只有一盆孤單單嘅黑胡椒同一個移植嘅黑胡椒枝，而家多咗一個夥伴🌱
BMC Ecology刊登嘅一份研究報告指出，植物有「鄰居」時，係會生得好啲。呢個研究係用咗辣椒種子，而羅勒就係呢個實驗嘅植物鄰居，結果顯示羅勒嘅出現係對辣椒嘅發芽情況有正面嘅影響✨ 似乎呢個研究可以解答到黑胡椒比起之前生長得好咗，陪伴就係最好嘅力量！
其實仲有唔少嘅品種一齊種係會幫助到彼此嘅生長，而呢啲組合會稱為「共榮植物」，如小黃瓜與青蔥、番茄與韭菜！
參考資料: M. Gagliano & M. Renton, “Love thy neighbour: facilitation through an alternative signalling modality in plants” from BMC Ecology, 種菜の趣味科學